Guddomiyihii gobolka banaadir ahna duqii Muqdisho Maxamed Dheere oo xilkii laga qaadey.

Guddoomiyihii Gobolka Banaadir ahna duqa magaalada Muqdisho Maxamed Cumar Xabeeb Maxamed Dheere ayaa maanta laga qaaday xilkii Guddoomiyaha iyo kan duqa magaalada Muqdisho.

War laga soo saarey  Xafiiska Ra'iisul Wasaaraha dowlada KMG Nuur Xasan Xuseen (Nuur Cadde) ayaa lagu caddeeyey in xilkii maamulka gobolka Banaadir iyo kii Duqa magaalada muqdisho laga qaaday Maxamed Cumar Xabeeb M/Dheere.

Wareegtada xilka looga qaadey Maxamed Dheere ayaa sidoo kale waxaa lagu sheegey in xilkaasi si ku meel ahaan ah uu usii hayn doono Maxamed Cusmaan Cali Dhagaxtuur oo horay u ahaa ku xigeenka duqa magaalada Muqdisho ee arimaha Bulshada.

Cabdi Xaaji Goobdood oo isagu ah afhayeenka Dowladda KMG  ayaa isaguna shaaca ka qaadey inay jirto xilka qaadista lagu sameeyey guddoomiye Maxamed Dheere waxaana uu xusey in arrintaasi la hor keeney golaha wasiirada ee dowladda KMG ah waxaa ay isla garteen soo jeedintii mudane Nuur Cadde.

 
Maxamed dheere ayaa waxaa uu in muddo ah lasoo shaqeeyey DKMG ah waxaana uu soo galey dagaallo badan oo lagu difaacayey Dowladda isagoo ka mid ahaa hogaamiyayaashii dagaalka ee lasoo dagaalamay maxaakiimtii la ridey. Maxamed Cumar Xabeeb waxaa kale oo lagu xusuustaa inuu degaan u sameeyey dowladdu markii ay kasoo guurtey magaalada Nayroobi ka dib markii shaki la galiyey inay dowladdu degto magaalda Muqdisho. si kataba ha ahaatee waxay ahayd arrin aan aad loo  fileynin in Maxamed Dheere laga qaado Muqdisho muddooyinkan marka la eego wax yaabo badan.

RSTV NEWSROOM

Newsroom@rstvonline.com

13432093

© RSTV 2008. All Rights Reserved